Fréttir og pistlar
Í gær veitti stjórn Öldrunarráðs Íslands tveimur doktorsnemum rannsóknarstyrki úr Rannsóknarsjóði Öldrunarráðs en ráðið veitir árlega styrki til rannsókna er varða öldrun. Styrkþegarnir eru Inga Valgerður Kristinsdóttirhjúkrunarfræðingur og doktorsnemi við HÍ og Kristján Godsk Rögnvaldsson læknir og doktorsnemi við HÍ. Öldrunarráð veitti að venju styrkinn á afmælisdegi Gísla heitins Sigurbjörnssonar, sem var forstjóri Grundar í tæp sextíu ár, en hann var einn aðal hvatamaðurinn að stofnun rannsóknarsjóðsins.
Verkefni Ingu snýr að árangursríkri heimahjúkrun en leiðir til uppbyggingar verða greindar útfrá InterRai-he gögnum. Meginmarkmið verkefnisins er að varpa ljósi á heilsufar, færni og aðstæður eldra fólks sem býr sjálfstæðri búsetu og nýtur aðstoðar formlegrar þjónustu og aðstandenda með það fyrir augum að greina leiðir til að efla heimahjúkrun þeirra. Kristján skoðar hinsvegar bætta greiningu samfélagslungnabólgu á Landspítala en um er að ræða algengan sjúkdóm með háa dánartíðni, þjáningu og kostnað fyrir einstaklinga sem og samfélag. Nýgengi er hæst meðal þeirra sem eru elstir og með lungnabólgu.
Á myndinni hér að ofan má sjá Önnu Birnu Jensdóttur, formann Öldrunarráðs Íslands, veita Ingu Valgerði Kristinsdóttur, styrkinn og á myndinni hér fyrir neðan tekur Kristján G. Rögnvaldsson á móti sínum styrk. Öldrunarráð Íslands óskar styrkhöfum til hamingju,
Fjölmargar tilnefningar bárust til viðurkenninga Öldrunarráðs Íslands árið 2018. Fyrir einstakt starf í þágu aldraðra hlutu Sesselja Magnúsdóttir og Stefán Helgi Stefánsson fyrir verkefnið Elligleði. Þau hafa um árabil heimsótt hjúkrunarheimili, sambýli og dagúrræði með reglubundnum hætti og glatt aldraða sem haldnir eru minnissjúkdómum með heillandi söng Stefáns Helga. Þau Sesselja og Stefán Helgi veittu viðurkenningunni móttöku og tók Stefán Helgi lagið fyrir aðalfundargesti. Hér eru þau á myndinni með Önnu Birnu formanni Öldrunarráðs.
Þá veitti Öldrunarráð sérstaka viðurkenningu til fyrirtækisins ÍSAL í Straumsvík, sem hefur myndað framúrskarandi stefnu varðandi starfslok starfsmanna sinna og framfylgir henni á ábyrgan máta. Sigurður Þór Ásgeirsson framkvæmdastjóri fjármálasviðs ÍSAL, veitti viðurkenningunni móttöku úr hendi Önnu Birnu Jensdóttur formanni Öldrunarráðs Íslands.
Fréttir og pistlar
Hér er að finna fréttir og pistla um málefni Öldrunarráðs Íslands og tengt efni.
Viðurkenningar Öldrunarráðs
Árlega veitir Öldrunarráð Íslands sérstaka viðurkenningu til einstaklings, stofnunar eða félagasamtaka sem þykja hafa unnið einstakt starf tengt málefnum aldraðra. Öllum er frjálst að senda inn tilnefningar og er auglýst eftir tilnefningum í fjölmiðlum. Viðurkenningin er svo veitt á aðalfundi Öldrunarráðs, sem haldinn er í maí.
Rannsóknarsjóður Öldrunarráðs
Rannsóknasjóður Öldrunarráðs Íslands hefur það hlutverk að styðja við bakið á rannsóknum í öldrunarmálum á Íslandi auk sérstakra verkefna annarra í málaflokknum, sem stjórn sjóðsins metur til þess fallin hverju sinni. Reynt er að veita styrki úr sjóðnum árlega. Aðalhvatamaður að stofnun sjóðsins var Gísli heitinn Sigurbjörnsson, forstjóri hjúkrunarheimilisins Grundar. Venja hefur verið að úthluta úr sjóðnum í námunda við afmælisdag Gísla, sem er 29. október.
Ráðstefnur og fundir
Hér er að finna upplýsingar um áhugaverðar ráðstefnur og fundi sem tengjast Öldrunarmálum.
