Fréttir og pistlar
Miðvikudaginn 13. september 2017 kl. 15.00-18.30 var haldið Framtíðarþing um farsæla öldrun í Stjórnsýsluhúsinu á Ísafirði. Þingið var samvinnuverkefni Öldrunarráðs Íslands, Landsambands eldri borgara og sveitarfélaganna Ísafjarðarbæjar, Bolungarvíkurkaupstaðar og Súðavíkurhrepps.
Þingstjóri var Ingrid Kuhlman frá Þekkingarmiðlun ehf. Þingið var með sama sniði og sambærileg þing sem haldin hafa verið, í Reykjavík í mars 2013, á Akureyri í maí 2015 og á Selfossi í nóvember 2015. Leitast var við að skapa vettvang fyrir þá sem koma að öldrunarmálum, vilja stuðla að uppbyggilegri umræðu um málefni aldraðra og skiptast á skoðunum um það hvernig samfélag við viljum búa eldri kynslóðum landsins. Markmið framtíðarþingsins á Vestfjörðum var að sama skapi að miðla upplýsingum og viðhorfum eldri borgara til stjórnvalda um það hvernig aldraðir sjá framtíðina fyrir sér og skapa leiðbeiningar til stjórnvalda hvernig aldraðir líta mál sín til framtíðar. Einnig að heyra sjónarmið og áherslur Vestfirðinga á þinginu og hvort áherslumunur sé t.d. á lífsviðhorfum milli landshluta. Þingstjóri skilar samantektarskýrslu frá þinginu.
Fundarfyrirkomulag byggði á sömu hugmyndafræði og notuð var á Þjóðfundunum sem haldnir voru í Reykjavík árin 2009 og 2010. Unnið var á nokkrum borðum og á hverju borði var borðstjóri en hans hlutverk var að sjá til þess að allir við borðið fengju jöfn tækifæri til að tjá sig og að tryggja virka hlustun þannig að öll sjónarmið kæmust að. Þátttakendur Framtíðarþingsins á Ísafirði voru 59 talsins.
Árlega veitir Öldrunarráð Íslands sérstaka viðurkenningu til einstaklings, stofnunar eða félagasamtaka sem þykja hafa unnið einstakt starf tengt málefnum aldraðra. Að þessu sinni voru tilnefndir 12 aðilar. Eftir að hafa fjallað um tilnefningarnar sem margar voru mjög áhugaverðar varð niðurstaðan Dr. Margrét Gústafsdóttir hjúkrunarfræðingur.
Margrét Gústafsdóttir hjúkrunarfræðingur sérmenntaði sig í öldrunarhjúkrun og var fyrsti íslenski hjúkrunarfræðingurinn sem lauk meistara- og síðar doktorsprófi í sérgreininni. Hún leiddi m.a. uppbyggingu öldrunarþjónustu B-álmu Borgarspítalans á upphafsárum starfseminnar þar og var hjúkrunarframkvæmdastjóri öldrunardeilda spítalans um árabil. Þá byggði Margrét upp kennslu í öldrunarhjúkrun við Háskóla Íslands og var í góðu sambandi við hvers kyns þjónustustofnanir fyrir eldri borgara með nemana sína í starfsþjálfun.
Margrét sinnti jafnframt rannsóknum á sínu sérsviði, kynnti á ráðstefnum, birti greinar og var ritstjóri bókarinnar ,,Hjúkrunarheimili. Leiðbeiningar og fróðleikur fyrir fjölskyldur á tímamótum.“
Margrét átti drjúgan þátt í því að hefja störf hjúkrunarfræðinga í þágu aldraðra til vegs og virðingar. Öldrunarráð Íslands er heiður af því að veita Dr. Margréti Gústafsdóttur hjúkrunarfræðingi viðurkenningu ráðsins 2017 fyrir gott og óeigingjarnt ævistarf að málefnum aldraðra.
Fréttir og pistlar
Hér er að finna fréttir og pistla um málefni Öldrunarráðs Íslands og tengt efni.
Viðurkenningar Öldrunarráðs
Árlega veitir Öldrunarráð Íslands sérstaka viðurkenningu til einstaklings, stofnunar eða félagasamtaka sem þykja hafa unnið einstakt starf tengt málefnum aldraðra. Öllum er frjálst að senda inn tilnefningar og er auglýst eftir tilnefningum í fjölmiðlum. Viðurkenningin er svo veitt á aðalfundi Öldrunarráðs, sem haldinn er í maí.
Rannsóknarsjóður Öldrunarráðs
Rannsóknasjóður Öldrunarráðs Íslands hefur það hlutverk að styðja við bakið á rannsóknum í öldrunarmálum á Íslandi auk sérstakra verkefna annarra í málaflokknum, sem stjórn sjóðsins metur til þess fallin hverju sinni. Reynt er að veita styrki úr sjóðnum árlega. Aðalhvatamaður að stofnun sjóðsins var Gísli heitinn Sigurbjörnsson, forstjóri hjúkrunarheimilisins Grundar. Venja hefur verið að úthluta úr sjóðnum í námunda við afmælisdag Gísla, sem er 29. október.
Ráðstefnur og fundir
Hér er að finna upplýsingar um áhugaverðar ráðstefnur og fundi sem tengjast Öldrunarmálum.
